1. |
||||
Quei che me lese i è sentadi al fogo de na bela fassina
che i se beve el vin vecio del so logo.
Quei che me lese i gà de la farina drento nel saco
e tuti i giorni i copa na galina.
Quei che me lese i fuma del tabaco da le nuvole bianche
dove i bruti pensieri i cambia scaco.
E i gà dei calti pieni de palanche e bestie in stala
e la firma ben in vista su le banche
E se de lori qualchedun se mala vien dotori da fora
e i gà brodo ristreto e i gà marsala.
Ma nisuni ghe pensa a la malora del poareto
ch'el gà la febre e che bison ch'el mora
Che nol pol destirarse sul so leto ma 'l se buta par tera
opur pagando el va a cuciarse in gheto
Pien de paura che ghe vegna sera par no catarse
co la questura che ghe fa la guera
E de questi che qua bison pensarse ne le feste coi fiochi
che a sto mondo il piaser l'è de giutarse
eco quel che ho scrito su i Pitochi
Eco na strada proprio poareta dove che el sol nol va mai a star de casa
in meso ai sassi spurga na fosseta che zo nel ciavega stravasa
Da la finestra guarda 'na gobeta piena de fredo e arente che se basa
tacade a un scuro drento na gabieta ghe do passare malade su 'na stasa.
Drento na porta scura scura scura ghe'l savatin che bate su le sole
e 'na gatina piena de paura
Ghe de le strasse a l'aria che se suga e zo par tera a far le capriole
ghe du mostri rachitici che zuga.
Ma sti du mostri che i se pissa adosso i à imparado la briscola e'l trisete
i bastona se i pol le butelete quando i se rabia e i vede tuto rosso.
Mi de conosso uno de conosso che el gà tirado na sassada a un prete
i gà la facia cuerta de brosete i brassi longhi el çerveleto grosso.
No se sa cosa i magna e te li cati su par la piassa co na scorsa in boca
o drio na fossa par negar dei gati
Soto al teatro drio a tirar le recie soto na torsa a destacar la moca
o uniti in sambra a tormentar le vecie.
|
||||
2. |
El bastardo
04:14
|
|||
El vedeleto el nasse da la vaca e l'agnelin el gà na pegora par mama
e questo que el fa "bee" quando el la ciama e da la teta mai nol se destaca
E la cagneta che l'è piena e straca la fa i cagneti e dopo la li sfama
el lugarin el fa el nio tacà a la rama e'l guarda ben che i ovi no i se maca.
Ma ti che i tà catà drento na ciesa fato su in sial vecio o soto a'n ponte
o in campagna in te'n prà longo la sesa o in te'n portego scuro sensa fondo
in meso a un giro de stradete sconte bruto bastardo ci t'à messo al mondo.
Ti te andarè remengo par la tera fiol de nissuni e servitor de tuti
parando in volta un caretin de fruti co na scrofola in parte par bandiera.
E soto al timbro de sta macia nera da farabuto in meso ai farabuti
come na rama che no da mai buti passarà passarà sta primavera.
Eco to pare el capita in carossa e mai più lu el se imagina che ti
te cori in volta drio par ciapar calcossa forsi to mama in giro a far le spese
se ocor la vegnarà a fermarse lì par questionar su un chilo de sirese.
Po un bel giorno la fevara te ciapa te scota i polsi e aida al ospedal
o da quel sito quando se sta mal da quel sito là no se ghe scapa.
I te dise che là se sta da papa medissine dotori un carneval
ma lì arente l'udor del funeral ma la morte che ride co la crapa.
E a la festa nissun se ferma mai par dirte ciao ma tuti i tira avanti
a portar su altri leti i so regai ma ti alora col fià da moribondo
maledisseli pura quei birbanti che i t'à lassado dopo messo al mondo
|
||||
3. |
Carboneta
03:44
|
|||
In quel sporco granar de gran palasso ghe un demonio de rati che rebuta
da un pare vecio e da na mare bruta sempre malada sora un leto strasso
Dove a la note par scaldarse in fasso la famejeta se ransigna tuta
Carboneta lè nata par la suta co na voja de fraga soto al brasso.
Carboneta savio no la gà vissi e gnanca un specio da speciarse el viso
e gnanca un fero da stocarse i rissi ma i cavei carbonela e i oci neri
dove sluse un canton de paradiso con qualche teraina de pensieri.
Carboneta to mama lè malada va a la filanda a guadagnar calcossa
e Carboneta la se mete in strada e la sta fora fin a la tardosa.
Na sera terminà las so giornada la porta a casa un bocolo de rosa
"Ehi Carboneta sito inamorada?" " Sior no" " ...busiara vergognosa
iè vegnudi a contarme che i tà visto col caposala" "No che no lè vera"
"Carboneta te digo che i tà visto" passa i giorni e na note de scondon
el caposala el l'à butà par tera soto a un mucio de bale de coton.
Da quela volta no lè sta più ela ma ghe vegnudo tanto mal al cor
che l'à ridota come na candela come na rama che la perso el fior
Ghe rimasto i cavei de carbonela ma drento i oci ghe sà smorsà el slusor
"Ehi Carboneta dunque com'ela?" "Ah - la risponde - se 'l savesse sior"
Se sente 'n urlo oh quanto quanto mal co un brasso in tochi e col facin stravolto
i à portà Carboneta a l'ospedal maledeta filanda a passo a passo
quel ingranaio che l'onor gà tolto quel ingranaio el gà robado un brasso.
|
||||
4. |
El gobo
04:22
|
|||
L'era lì fermo sul canton del gheto ch'el sigava "Cerini! Fulminanti!"
co la testa cassada nel coleto e la botega a spingolon davanti.
Passava i mostri e i ghe disea "gobeto" passava i siori e i se insolava i guanti
e nissun ghe dava i soldi par el leto e l'orolojo intanto el caminava avanti
Che quando un poro can nasse segnado no i lo ciama col nome de bateso
ma gobo storto stropio mal tajado.
E invesse se l'è un sior come che va el pol essar più storto de un ponteso
guai la madona a dir la verità.
A mesanote i sera la locanda e bastiemando el gobo el se rampega
sora i scalini de na ciesa granda co la fame ch'el stomego ghe sbrega.
Lu nol gà leto lu nol gà na branda nè un paion nè un cussin nè na carega
ma 'l va sò co la testa da na banda su i scatolini de la so botega.
E sognando ghe par che dai cerini salta su co la facia invernissada
de le done in camisa a farghe inchini.
Che lo invida a balar qualache matada che ghe tasta la goba coi dentini
e i è le done che lu el vende in strada.
Una ghe parla "gobo come vala?" lu el risponde "la va male e lei?"
questa qua su i zenoci la ghe bala e lu pronto el ghe petena i cavei.
St'altra adobada de na tenda giala la ghe dise tocandolo coi dei
"Dime te pesa sto fagoto su la spala?" e lu da gnagno "Bei cerini bei"
Oh che sogni corgà sora i scalini forsi stanote la ghe passa lissia
parchè guoi se i lo cata i questurini
Ospia iè qua par colpa de la luna i lo ciapa i lo scurla i lo desmissia
gnanca i gobi a sto mondo i gà fortuna.
|
||||
5. |
El vecio dela bancheta
03:00
|
|||
Ecolo qua a st'ora chieta chieta che le serve e i soldà se guarda in facia
e el grio el ghe core drio a la cavaleta par contarghe el so amor soto la macia.
Un vecio a strapegon su na bancheta el se comoda a pian ch'el par ch'el sbacia
l'ultimo fià spassando la piereta col fassoleto se de no el se macia.
C'elo sto vecio a dimandarghe a lu là fato tute quante le campagne
e del corajo el ghe n'avea per du ma è passado i bei ani e le cucagne
e no ghe resta che pensarghe su come un decoto par le sò magagne.
Dopo disnar sto vecio el fa du passi for da la porta par spassarse un'ora
el se tol na bancheta el conta i sassi discorendo de schei co la malora.
Ma vien ch'el corpo a furia de strapassi da par tute le parti el ghe dolora
e gò paura che coi primi giassi su nel so buso poro vecio el mora.
E perchè el va a çercar la carità de porta in porta el trova de la gente
che vol spedirlo a la mendicità là ghe pan là ghe vin ghe loghi caldi
"Va al ricovaro vecio!" nol ghe sente parchè lu l'è sta via con Garibaldi.
Tute le foje iè cascade in tera e ghe passado su na nevegada
semo in diçembre e el grio che se despera co la so cavalota inamorada.
Drento la tana el speta primavera ma sto vecio co l'anima ingiassada
el va sempre a sponsar su la so piera pertegando a pianin la stessa strada.
E la sera del giorno de nadal gran bruto giorno par un desperado
che nol g'abia amicissie e'l staga mal dopo che a casa speta e che te speta
i è vegnudi a çercarlo e i l'à trovado morto desteso su la so bancheta.
|
||||
6. |
El segreto dele fameje
05:55
|
|||
L'ò incontà l'altro giono par la strada e me l'ò tolto a brasso in compagnia
el pareva un lume in agonia drio che l'aspeta l'ultima stissada.
El gavea na facia ricamada da tuti i segni dela carestia e
ne i oci una çerta poesia che te contava atuto in te n'ociada.
A guardarlo così sensa pensarghe l'era vestido come un gran signor
ma se te stavi un momento lì a badarghe ghera la stofa che mostrava el muso
la siarpeta smarida de color un stival so de taco e l'altro sbuso.
Digo mi: "come vala?" un malcontento ghe sbrissià per i oci e in do parole
semo a drio che i ne verse falimento e m'è tocado pianter lì le scole.
Come una barca sbalotà dal vento son restà mi co le me done sole
su par i leti de l'apartamento la miseria la fa le capriole.
E bisogna comprar vestiti bei par far bona figura in società
sempre in barufa con quei porchi schei e de drio al paravento no i lo crede
che ghe sia dei pitochi se lo sa passa la fame e c'elo che la vede.
I creditori i capita a le spale e i te porta el bongiorno ogni matina
e tuti i giorni l'è la stessa spina e tuti i giorni i è le stessa bale.
"Sior paron ghe saria quela cambiale" "Ben ch'el porta passiensa n'altra nina"
"Sior son stufa de far la buratina" "Sior son stufo de farle le so scale"
E intanto de scondon giorno par giorno core la roba al monte de pietà
la roba che no vien mai de ritorno e ancò i recini e le tovaje e i seci
e doman l'orolojo del popà co le momorie de i to pori veci.
"Ela mama?" Oh la mama l'è na santa rassegnada l'è un angelo che sgola
par la casa l'è un angelo che canta quando noantri se gà el gropo in gola.
Se ghe diese la fa vedar çinquanta la ne basa così la ne consola
ma la miseria la se fa sempre più tanta e no se vede mai carne su la tola.
Che una pora fameja decaduda quando che la miseria la le imbranca
par quanto che la fassa e che la suda la tera soto ai piè sempre ghe manca
ciò se incontra i amissi e se i saluda e quei viliachi no i risponde gnanca.
E così se sassina i più bei ani e vien l'inverno che ghe fioca in çima
e a poco a poco se desfila i grani de sto rosario che la man te lima.
Te disi oh passarà tuti i malani e tornaremo siori come prima
ma sà se resta sempre pori cani e persi i soldi se perde anca la stima.
Infin che veci i te fa far le carte par mandarte al ricovero parchè
parchè nissuni vol più giutarte e la gente che la vede sempre bruto
l'andarà a ciacolar par i cafè che te eri un sior ma t'è magnado tuto.
|
||||
7. |
San Martin
02:21
|
|||
"Dunque?" "Nol vol saverghene - l'à dito – l'è du mesi che tribulo e che speto
via da mi via da mi ve lasso el leto ma'l resto me lo tegno par l'afito
gò un fiol ai studi che nol fa pulito gò el predial da pagar che son poareto
se me portè fin l'ultimo scheeto forsi cissà che no tiremo drito".
Mi gò risposto che te si malada e che te sì anca in stato interessante
l'à sigado "doman ve buto in strada, doman ve buto in strada"
Gò zontà che andar via ti te me mori e seto cosa el m'à dito quel birbante
che i fioi ghe li lassemo far ai siori così la pora incinta coi dolori a torno
e el fagoto de quela creaturina co la febre l'angossa el capo storno
l'à sa messo a frugar par la cusina, l'à sa messo a frugar par la cusina.
El giorno dopo proprio a mesogiorno co na pioveta fina fina fina
e un vento che parava de ritorno i à cargado na mesa caretina
e via de corsa in volta par çercar qualche buso distante da le piasse
Par no spendar na caneva un granar pori pitochi messi su le asse
dise la gente che li vede andar: "Largo che passa un San Martin de strasse, largo
che passa un San Martin de strasse!"
|
||||
8. |
I va in Merica
03:46
|
|||
Fulminadi da un fraco de tempesta l'erba dei prè par na metà passia
brusà le vigne da la malatia che no lassa i vilani mai de pesta.
Ipotecado tuto quel che resta col formento che val na carestia
ogni paese el gà la so agonia e le fameje un pelagroso a testa.
Crepà la vaca che dasea el formajo morta la dona a partorir na fiola
protestà le cambiale dal notaio una festa seradi a l'osteria
co un gran pugno batù sora la tola "porca Italia" i bastiema andemo via.
E i se conta in fra tuti quanti sio apena diese che pol far strapasso
el resto done coi butini in brasso el resto veci e buteleti a drio.
Ma a star qua no se magna no par Dio bisognarà pur farlo sto gran passo
che se l'inverno el ne capita col giasso pori noantri el ghe ne fa un desio.
Drento l'otobre carghi de fagoti dopo aver dito mal de tuti i siori
dopo aver fusilà tri quatro goti co la testa sbarlota imbriagada
i se dà du struconi tra de lori e tontonando i ciapa su la strada.
|
||||
9. |
La bogonela
01:34
|
|||
La bogonela l'è na roba giala tuta piena de pocio molesin
che vista da lontan la par na bala che core in pressia ma la va pianin
la ghe mete du giorni a far na scala e la fa quatro tape par scalin
"Oh siora bogonela dove vala" "Vago par acqua me sa impissà el camin"
La me morosa invesse Dio la core che la par la ferovia de casa nostra
se te ghedisi de star sentà la more e la continua così come na giostra.
Ma se gò da contar la verità la bogonela i corni la li mostra
la bogonela i corni la li mostra e me morosa invesse la li fa.
|
Streaming and Download help
If you like Stefano Orlandi, you may also like:
Bandcamp Daily your guide to the world of Bandcamp